Bakı Beynəlxalq Multikulturalizm Mərkəzi (BBMM), Azərbaycanın Xorvatiyadakı səfirliyi və Zaqreb Universitetinin birgə təşkilatçılığı ilə bu ali təhsil ocağında Azərbaycanın multikulturalizm modelinə həsr olunmuş seminar təşkil olunub.
BBMM-dən AZƏRTAC-a bildiriblər ki, tədbirdə Azərbaycanın Xorvatiyadakı fövqəladə və səlahiyyətli səfiri Fəxrəddin Qurbanov, Zaqreb Universitetinin rektoru professor Damir Boras və BBMM-in Xorvatiyadan olan gənc səfiri, Beynəlxalq Multikulturalizm Yay və Qış Məktəblərinin iştirakçısı İmran Srebrenikoviç çıxış ediblər. Çıxışlar zamanı xorvatiyalı tələbə və alimlərə Azərbaycan dövlətinin multikulturalizm siyasəti, mədəniyyətlərarası və dinlərarası dialoqa verdiyi töhfə, eyni zamanda, BBMM-in fəaliyyəti, həyata keçirdiyi layihələr haqqında geniş məlumat verilib, videomaterial nümayiş olunub.
Qeyd etmək lazımdır ki, xorvatiyalı gənclər Multikulturalizm Mərkəzinin fəaliyyəti çərçivəsində olan müxtəlif layihələrdə daim fəallıq göstəriblər. Sevindirici haldır ki, artıq xarici ölkələrdə Azərbaycan multikulturalizmini Azərbaycanın gənc dostları təbliğ edir, öyrənir və öyrədir.
AZƏRTAC